Dende O Piornedo a Portomarín: a crise do coronavirus abre a porta a redescubrir destinos na provincia

Reportaxe de Silvia López publicada no Lugo Xornal o 5 de maio do 2020

A situación excepcional que vivimos botou por terra os plans turísticos de visitantes e profesionais do sector. Guido Álvarez busca repoñerse ao tempo que ofrece unha alternativa de ocio para un verán estraño: unha vintena de “xornadas viaxeiras” para coñecer as “marabillas” que hai de norte a sur de Lugo.

A crise sanitaria obrigou a reformular modos de facer e de vivir. Coa mobilidade restrinxida, o turismo é un dos sectores máis afectados pola pandemia e a súa supervivencia pasa pola reinvención. Nesa liña van xurdindo iniciativas encamiñadas a un turismo de proximidade que aposta por viaxar a lugares da provincia como alternativa de ocio para un verán seguramente estraño.

Esa é a nova proposta do guía turístico Guido Álvarez (Guido Guía), que con #RedescubrindoLugo ofrece unha vintena de “xornadas viaxeiras” de norte a sur da provincia para coñecer as “marabillas” que temos tan preto das nosas casas. Serán visitas guiadas a localizacións como O Piornedo, Portomarín, Barreiros, a Ribeira Sacra ou a propia capital luguesa, entre outros moitos, onde se aproveitará para pasar o día, facer un picnic, coñecer a historia do lugar…

REFACER A TEMPADA TRUNCADA

“O plan inicial para este 2020 era seguir cos paseos #OLugoMenosCoñecido e os servizos a demanda para asociacións, empresas, grupos e particulares”, explica Guido Álvarez, “pero todo isto cancelouse, como é lóxico, pola crise sanitaria”. Daquela, cadaquén cavila como encarar o ano profesional e economicamente, xusto no medio da tempada alta truncada. “Aí é onde nace #RedescubrindoLugo para volver á acción cando todo pase. Ou, mellor dito, cando sexa legalmente posible”.

A actual situación non permite fixar aínda ao 100% as datas para esas excursións, pero prevese que sexan entre xuño e setembro, sempre de acordo á normativa. Con todo, xa é posible reservar praza de xeito anticipado e con desconto (ata o 17 de maio) para cada unha destas xornadas viaxeiras, tal como explica na súa web detalladamente. “Decidimos formulalo así, e non como paseos guiados, para que a experiencia sexa máis completa e para dar unha alternativa de entretemento para este verán”, sinala o promotor da idea.

UNS VINTE DESTINOS… E MÁIS EN CAMIÑO!

Ademais, a antelación coa que foi lanzada a iniciativa permite xogar cos tempos para incorporar novos concellos e destinos ao programa. De momento, xa están confirmadas as saídas para redescubrir PiornedoBarreirosNegueira de MuñizMondoñedo, a Ribeira Sacra, ViveiroPortomarínO CourelFozCospeitoMonterrosoA PontenovaBegonteAlfozO XistralRibadeoCastro de Rei e O Valadouro. Así mesmo, tamén haberá ocasión de coñecer ‘os mundos do Miño’, a arte urbana lucense e a histórica Lucus Augusti.

“Estou súper contento, porque xa contactaron comigo varios colectivos para sumarse. Friol e Castroverde son dous dos lugares que probablemente se incorporen xa”, engade Guido Álvarez.

En todo caso, di non apartarse demasiado da liña que xa caracterizaba o seu proxecto profesional: “un enfoque diferente ao turismo tradicional, buscando unha proximidade persoal. Un intercambio cultural; un achegamento ao patrimonio profundo, pero non denso; unha oportunidade para coñecer xuntos, en comunidade, o noso territorio”.